Son zamanlar şəhər küçələrində sahibsiz it və pişiklərin sayında nəzərəçarpacaq artım müşahidə olunur. Bu vəziyyət bəzi vətəndaşlarda narahatlıq yaradarkən, digər tərəfdən heyvansevərlər bu canlılara qarşı daha mərhəmətli davranılmasını tələb edirlər.
newsbaku.az xəbər verir ki, müşahidələrə əsasən, əsasən paytaxtın mərkəzi və kənar ərazilərində, həmçinin yaşayış massivləri ətrafında çoxsaylı sahibsiz heyvanlara rast gəlinir. Bu heyvanların bir çoxu ac və xəstə vəziyyətdə olur, bəziləri isə insanlarla təmasda agresiv davrana bilir.
Müvafiq qurumlar şəhər daxilində monitorinqləri gücləndirib, sahibsiz heyvanların toplanması, müayinəsi və sığınacaqlara yerləşdirilməsi istiqamətində tədbirlər həyata keçirirlər. Bununla yanaşı, yeni sterilizasiya və peyvənd proqramlarının icrasına da start verilib.
Sahibsiz heyvanların çoxalmasının qarşısını almaq üçün ictimai maarifləndirmə işlərinin aparılmasının vacibliyi vurğulanır. Mütəxəssislər qeyd edirlər ki, ev heyvanı saxlayan şəxslər onların çoxalmasına nəzarət etməli və küçəyə atmaq əvəzinə, məsuliyyətlə davranmalıdırlar.
Qeyd edək ki, şəhərdə bir neçə yeni heyvan sığınacağı tikilməkdədir və bu sığınacaqlar həm müvəqqəti yerləşdirmə, həm də heyvanların sahibləndirilməsi üçün nəzərdə tutulub.
Jalə Quliyeva
newsbaku.az
