Kreml cümə günü açıqlayıb ki, Rusiya Prezidenti Vladimir Putin və Ukrayna Prezidenti Vladimir Zelenski arasında keçiriləcək görüş yalnız sülh sazişinin yekunlaşdırılması məqsədi daşıya bilər.
newsbaku.az Reuters-ə istinadən xəbər verir ki, Kremlin sözçüsü Dmitri Peskov bildirib: “Ukraynanın bu cür görüşün keçirilməsi ilə bağlı təklifinin avqustun sonunadək gerçəkləşməsi mümkün görünmür. Zirvə görüşü münaqişənin nizamlanmasına son nöqtəni qoymalı və ekspertlər tərəfindən hazırlanmış mexanizmləri və razılaşmaları möhkəmləndirə bilər. Əks halda belə bir görüşün keçirilməsi məqsədəuyğun sayılmaz.”
“30 gün ərzində bu qədər mürəkkəb bir prosesi yekunlaşdırmaq mümkündürmü? Aydındır ki, bu, çətin görünür,” – deyə Peskov bildirib.
Ukrayna tərəfi isə bildirir ki, danışıqlar prosesində irəliləyişə nail olmaq üçün liderlərin birbaşa görüşü vacibdir. Xatırladaq ki, tərəflər mayın ortalarından bəri Türkiyədə üç qısa sülh danışıqları sessiyası keçirib.
Jurnalistlərə verdiyi açıqlamada Prezident Volodimir Zelenski deyib ki, Rusiya artıq mümkün görüş məsələsinə baxmağa başlayıb: “İndi aparılan danışıqlarda onlar bu mövzunu müzakirəyə çıxarıblar. Bu, artıq müəyyən bir görüş formatına doğru addım deməkdir.”
Ukraynalı nümayəndənin sözlərinə görə, çərşənbə günü keçirilən və cəmi 40 dəqiqə davam edən son raunddan sonra Kiyev avqust ayında Putin-Zelenski görüşünü təklif edib. Bu təklif ABŞ prezidenti Donald Trampın ötən həftə razılaşma üçün təyin etdiyi 50 günlük vaxt çərçivəsinə uyğun gəlir.
Tramp bəyan edib ki, əgər sentyabrın əvvəlinə qədər razılıq əldə olunmasa, Rusiya və onun ixrac məhsullarını alan ölkələr yeni sanksiyalarla üzləşə bilər.
Peskov isə bir daha hər iki tərəfin mövqelərinin “tamamilə zidd” olduğunu vurğulayıb.
“Onların bir anda ortaq mövqeyə gəlməsi real görünmür. Bu, çox incə və uzunmüddətli diplomatik səylər tələb edəcək,” – deyə o bildirib.
newsbaku.az
