Türkiyə Külək Enerjisi Konqresi (TÜREK 2025) çərçivəsində İzmirdə IV Türkiyə-Azərbaycan Enerji Forumu keçirilib.
newsbaku.az “Anadolu” agentliyinə istinadən xəbər verir ki, IV Türkiyə-Azərbaycan Enerji Forumu Azərbaycanın energetika naziri Pərviz Şahbazov və Türkiyənin energetika və təbii sərvətlər naziri Alparslan Bayraktarın həmsədrliyi ilə keçirilib.
Açılış mərasimində çıxış edən nazir Pərviz Şahbazov vurğulayıb ki, iki ölkə arasında enerji əməkdaşlığı regional və qlobal enerji təhlükəsizliyində mühüm rol oynayır.
Nazir bildirib ki, Türkiyə və Azərbaycan prezidentlərinin müdrikliyi, uzaqgörənliyi və iqtisadi potensialın düzgün prioritetləşdirilməsi sayəsində enerji sahəsində uğurlu əməkdaşlığımız regional və qlobal enerji təhlükəsizliyində mühüm rol oynayır. O, Türkiyə və Azərbaycanın iqlim dəyişikliyinin yaratdığı riskləri və enerji keçidinin təqdim etdiyi imkanları nəzərə alaraq enerji və iqlim sektorlarında tərəfdaşlıqlarını genişləndirdiyini qeyd edib.
Azərbaycanın energetika naziri Pərviz Şahbazov da çıxışında Türkiyənin bərpa olunan enerji, enerji saxlama sistemləri, yaşıl hidrogen, karbon tutma texnologiyaları, enerji səmərəliliyi, enerji bazarı əlaqələri və tənzimlənməsi sahəsində təcrübəsi və dəstəyinin Azərbaycan üçün xüsusi əhəmiyyət kəsb etdiyini vurğulayıb. Şahbazov, bütün proseslərdə həmişə olduğu kimi, Türkiyəni təmiz enerji gələcəyi üçün böyük müttəfiq hesab etdiklərini bildirib.
P.Şahbazov Enerji Forumunun əməkdaşlıq gündəliyinə karbohidrogenlər və mədənçilikdən tutmuş bərpa olunan enerji və enerji tənzimlənməsinə qədər altı əsas əməkdaşlıq sahəsinin daxil edilməsinin vacibliyini vurğulayıb.
Çıxışlardan sonra P.Şahbazov və həmkarı Bayraktar iki ölkə arasında enerji sahəsində əməkdaşlığın inkişafını nəzərdə tutan Forum Protokolunu imzalayıblar. Protokola əsasən, tərəflər enerji sahəsində fəaliyyət göstərən qlobal və regional təşkilatlar və qurumlar çərçivəsində əməkdaşlıq və koordinasiyanı gücləndirmək və saxlamaq barədə razılığa gələcəklər. Türkiyə və Azərbaycanın müvafiq dövlət və özəl sektorunun iştirakı ilə yaradılan altı işçi qrupu ilə fəaliyyət göstərəcək forumda gün ərzində karbohidrogen və neft-kimya, bərpa olunan enerji, elektrik bazarı, elektrik enerjisinin paylanması və ötürülməsi, tənzimləmə, enerji səmərəliliyi və mədənçıxarma ilə bağlı işçi qruplarının irəli sürdüyü işlər də müzakirə olunacaq.
newsbaku.az
