Portuqaliyalı mütəxəssis Jorji Jezuş “Ən-Nəsr”in baş məşqçisi təyin olunub.
newsbaku.az xəbər verir ki, 70 yaşlı çalışdırıcı daha əvvəl Portuqaliyanın bir sıra klublarında, o cümlədən “Benfika”da işləyib. O bu komanda ilə üç dəfə ölkə çempionu olub, iki dəfə isə Avropa Liqasının finalına yüksəlib.
Daha sonra Jezuş “Əl-Hilal”, “Flamenqo” və “Fənərbağça” kimi klubları çalışdırıb.
“Ən-Nəsr”də o, Portuqaliya millisinin hücumçusu Kriştianu Ronaldu ilə çempionluq qazanmağa çalışacaq. 40 yaşlı ulduz futbolçu həmyerlisi olan mütəxəssisə xoş gəldin edib. “Xoş gəldiniz, cənab Jorji Jezuş!” – deyə komandanın kapitanı sosial şəbəkə hesabında yazıb.
Qeyd edək ki, avqust ayında “Ən-Nəsr” Səudiyyə Ərəbistanı Superkubokunun oyunlarında iştirak edəcək. Turnirdə “Əl-İttihad”, “Əl-Hilal” və “Əl-Qadisiyyə” də yer alacaq.
newsbaku.az
